صحيفة نبض الشعب الاسبوعيه رئيس التحرير جعفر الخابوري

السادة المر تشون ج٢
عنوان الحلقة "ارجع هات المضروب"

خليني أوضح حاجة انك لو لاقيت فاسد في مكان ما بيكون مش لوحده ولازم تعرف أنهم بيكونوا عصابة مع بعض وكلهم متصلين مع بعض بحلقة ما فلو حاولت انك تتخلص من واحد منهم هتلاقيهم كلهم تكاتفوا ضدك والحكاية الجاية ديه هتوضح كل حاجة.

عم عبده كان كبير الفنين عندنا في الورشة واتحط في لجنة المشتريات لأول مرة في حياته ولجنة المشتريات ديه بتنزل تجيب احتياجات المصنع من السوق المحلي ولازم اللجنة تتكون من حد من الورش وحد من القطاع المالي وحد من التجاري وحد من التسويق المهم نزل عم عبده معاهم لوسط البلد عشان يشتروا الحاجة بس قبل ما يروح يشتري قالوله إحنا جعانين مش نفسك تأكل أكلة حلوة فقالهم نفسي طبعاً فخدوه في مطعم في وسط البلد وكلوا هناك ولما جه يحاسب علي اللي اكله قالوله عيب إحنا عازمينك فقالهم ماشي وبعد كده عزموه علي عصير فقالهم عنكم انتوا أنا اللي حاسب قالوه عيب إحنا عازمينك فقالهم ماشي وبعدين راحوا لأول محل هيشتروا منه حاجتهم والحاجة اللي هيشتروها كانت منتج نمطي وبيستهلك كتير في المصنع يعني زي رومان البلي والجلب والمسامير والورد وزيوت التبريد و الشحيم وغيره يعني حاجات بتجيبها كل فترة وعم عبده راجل ابن سوق وعارف اسعار الحاجات ديه فبيبص في الفاتورة لاقي الاسعار ديه غير منطقية وعلي الأقل مرة ونص فقالهم إيه ده فقالوه هو انت فاكر إن الاكل والشرب اللي انت كلته ده من فلوسنا ده من خير المصنع وأنت زي حالتنا علي ادك فقول يا باسط وأدخل معانا عشان تأكل لقمة نضيفة انت وعيالك فقالهم اللقمة اللي بالحرا م أنا مش محتاجها ودفع لهم فلوس الأكل والعصير وقال لصاحب المحل هات الفاتورة الأصلية بما يرضي الله وفعلاً جاب الفاتورة الأصلية.

(هنا تفتكر إن الحكاية خلصت وان الحق انتصر علي الباطل لكن اللي حصل تاني يوم مع عن عبده كان غريب)

ثاني يوم بيروح عم عبده لرئيس القطاع وبيحكيله اللي حصل وبيديله الفاتورة الأصلية فرئيس القطاع قاله ارجع هات الفاتورة المضروبة فقاله يا ريس إزاي قاله زي ما بقولك كده لو مجبتش الفاتورة المضروبة زمايلك هيتحولوا للتحقيق ويمكن يتفصلوا وانت ميرضكش إن زمايلك يتفصلوا وانت كده بتعاقب أولادهم مش بتعاقبهم هما لكن أنا هعرف ادبهم إزاي فقاله خلاص هأرجع اجيبها بس تشيلني من لجنة المشتريات قاله ماشي وقد كان.

بعد ما خلص عم عبده حكايته طلعت علي المدير العام بتاعي وحكيتله اللي قالوه ليا عم عبده فقولتله هو الريس ليه خلاه يجيب الفاتورة المضروبة يعني ناس فسده لازم يتعاقبوا بغض النظر عن أسرته لأنه لو هو مخافش عليهم فمحدش يطالبني اني اخاف عليهم فرد عليا المدير العام وقالي الموضوع مش موضوع أنه خايف عليهم الموضوع أن ديه اجزاء نمطية يعني بتستهلك بشكل دائم في المصنع واللجان ديه بتكون بقالها سنين يعني الناس ديه حرفياً عملت ثروة من المصنع فلو الموضوع اتفتحت هيكون كبير اوي ومش هيحققوا في ديه بس ولكن هيتم مراجعة كل الفواتير اللي بتيجي المصنع والرئيس بتاعنا بيجيب هو كمان فواتير مضروبة يعني لو دول وقعوا وحصل تحقيق والتحقيق وسع فهو كمان هيتجاب معاهم رغم إن كل واحد ميعرفش أن الثاني حر امي بس لازم يحموا بعض ضد الشرفاء عشان ميقعوش كلهم فهمت ليه بقي قاله ارجع هات المضروب.